پاکستان میں کورونا وائرس کی صورتحال بہتر۔

دنیا کے بیشتر ممالک میں اس عالمی وبا کے پھیلاؤ میں اضافے کے برعکس پاکستان میں صورتحال بہتری کی جانب گامزن ہے۔

پاکستان میں کورونا وائرس کے مجموعی کیسز کی تعداد 2 لاکھ 95 ہزار 849 ہوچکی ہے جس میں سے 2 لاکھ 80 ہزار 682 صحتیاب ہوئے ہیں جبکہ 6 ہزار 294 جانبرنا ہوسکے۔

تاہم ماہرین صحت نے خبردار کیا ہے کہ ذراسی لاپرواہی اور بے احتیاطی اس وائرس کے دوبارہ پھیلاؤ کا سبب بن سکتی ہے۔
مجموعی صورتحال کی بات کریں تو پاکستان میں اس عالمی وبا نے 6 ماہ سے زائد عرصہ پورا کرلیا ہے اور اس دوران یہ مختلف مراحل سے گزری ہے۔
26 فروری کو کورونا وائرس کی وبا کے پہلے کیس سے ملک میں کورونا کیسز کی تعداد کافی کم تھی، تاہم اپریل کے مہینےمیں اس میں اضافہ شروع ہوا جو مئی میں کافی حد تک بڑھ گیاتھا۔
تاہم جون کا مہینہ ایسا تھا جس میں یہ وائرس اپنی بلندیوں کو پہنچا اور یومیہ کیسز 6 ہزار اور اموات 100 سے تجاوز کرنے لگیں تھی جبکہ ہسپتال پر دباؤ بھی بہت زیادہ بڑھ گیاتھا-

جولائی کے مہینے میں کیسز اور اموات میں کمی آنا شروع ہوئی اور اگست کے مہینے میں صورتحال بہتر ہوگئی اور یومیہ کیسز سیکڑوں اور اموات اوسطاً درجن بھر تک پہنچ گئیں۔

ملک میں اس وائرس سے سب سے زیادہ متاثر صوبے سندھ اور پنجاب ہیں، صوبہ سندھ میں متاثرین کی مجموعی تعداد ایک لاکھ 29 ہزار 348 ہے جبکہ پنجاب میں یہ تعداد 96 ہزار 769 تک پہنچ چکی ہے۔
صوبہ خیبرپختونخوا میں کورونا وائرس سے 36 ہزار 44 افراد متاثر ہوچکے ہیں جبکہ صوبہ بلوچستان میں وبا میں مبتلا ہونے والوں کی تعداد 12 ہزار 869 ہے۔
علاوہ ازیں وفاقی دارالحکومت اسلام آباد میں 15 ہزار 625، گلگت بلتستان میں 2 ہزار 896 اور کشمیر میں 2 ہزار 297 افراد عالمی وبا کا شکار ہوچکے ہیں۔

ملک میں اموات کی صورتحال
سندھ: 2401
پنجاب: 2198
خیبرپختونخوا: 1250
بلوچستان: 141
اسلام آباد: 175
آزاد کشمیر: 62
گلگت بلتستان: 67