دنیا کے دیگر ممالک کی طرح سویڈن میں پاکستانیوں نے بھی یوم پاکستان انتہائی جوش و خروش کے ساتھ منایا۔ اس سلسلہ کی ایک بڑی تقریب اسٹاک ہوم کے نواح میں فتیا میں منعقد ہوئی جس کے مہمان خصوصی سفیر پاکستان احمد حسین ڈھائیو او ر ان کی اہلیہ تھیں۔ اس پروقار تقریب کا اہتمام اسٹاک کی دو بڑی پاکستانی تنظیموں ، پاکستان انفارمیشن اینڈ کلچرل سوسائٹی( PICS )اور پاک سویڈ ن ویلفیئر سوسائٹی سویڈن (PSCWS )نے مشترکہ طور پر کیا ہے۔یوم پاکستان کی اس تقریب میں خواتین اور بچے بھی بڑی تعداد میں شریک ہوئے۔غزال مہدی اور سائیں رحمت نے بہت خوبصورت انداز میں میزبانی کے فرائض سرنجام دیئے۔ تصدق حسین اور زیب عالم کی آواز میں ملی نغموں نے خوب سماں باندھا ۔ شاہد گجرنے میوزکل چیئر کے مقابلہ میں اول انعام حاصل کیا۔ذہنی آزمائش، موسیقی ، شاعری اور دیگر بہت سی سرگرمیاں نے تقریب کی رونق میں اضافہ کیا۔بچوں کی جانب سے پیش کی جانے والی سرگرمیوں نے حاضرین کو متوجہ کئے رکھا خصوصا جب آرمی پبلک سکول پشاور کے بچوں کی یاد میں ” میرے بابا” نغمہ بچوں نے اجتماعی انداز میں پیش کیا تو ماحول بہت سنجیدہ ہوگیا ۔ تقریب سے خطاب کرتے ہوئے پاک سویڈن ویلفیئر سوسائٹی سویڈن کے صدر عامر جبار نے کہا کہ ہماری کوشش ہے کہ نوجوان نسل کا تعلق پاکستان سے قائم رہے اور اس مقصد کے لئے تقریبات کا اہتمام کرتے رہیں گے۔ انہوں نے کہا ہم سویڈن میں نئے آنے والے پاکستانیوں کو خوش آمدید کہتے ہیں اور ہماری تنظیم ان کی فلاح و بہبود کے لیے کام کرتی رہے گی۔ اس موقع پر تقریب کے مہمان خصوصی سفیر پاکستان احمد حسین ڈھائیو نے کہا کہ انہیں اس تقریب میں شرکت کرکے بہت خوشی ہورہی ہے۔ ایسی تقریبا ت سے ہمارے قومی جذبہ کا اظہار ہوتا ہے۔ بیرون ممالک میں مقیم پاکستانی کو چاہیے کہ مقامی لوگوں کو پاکستان کی سیاحت کے لیے آمادہ کریں۔ انہوں نے کہا ہم کشمیری عوام کی جدوجہد آزادی کی حمایت کرتے رہیں گے اور یہ کوئی پاک بھارت تنازعہ نہیں بلکہ ان کے حق خود ارادیت کا سوال ہے۔ ایک مضبوط پاکستان ہی جموں کشمیر کی آزادی کا ضامن ہے۔ تقریب کے آخر میں مہمان خصوصی نے انعامات تقسیم کیئے۔
259
